NOLI NOCERE!!!
მოგესალმები სტუმარი | RSS
საიტის მენიუ
საიტის კატეგორიები
pharmanews მედიკამენტი [0]
რჩევები [0]
ფარმაცევტული კომპანიები [1]
ჩატი
სტატისტიკა
მთავარი » 2010 » სექტემბერი » 3 » თუ ართრიტი გაქვთ, პარკინსონიზმისა აღარ უნდა გეშინოდეთ
9:28 PM
თუ ართრიტი გაქვთ, პარკინსონიზმისა აღარ უნდა გეშინოდეთ


ახლახან გაირკვა, რომ ანთების საწინააღმდეგო არასტეროიდული საშუალებები, იბუპროფენი, ნაპროქსენი და სხვები, რომლებსაც წარმატებით იყენებენ ართრიტის, ართრალგიისა და ნევრიტის სამკურნალოდ, რეგულარული მიღების შემთხვევაში პარიკინსონის დაავადების განვითარების ალბათობას ამცირებს. კალიფორნიის უნივერსიტეტის მკვლევართა ჯგუფმა 579 ადამიანი გამოიკვლია, რომელთაგან ნახევარს პარკინსონის დაავადების საწყისი სტადია ჰქონდა. გამოკვლევის მონაწილეებს უსვამდნენ კითხვებს ასპირინისა და ანთების საწინააღმდეგო სხვა საშუალებების მიღების სიხშირესა და ხანგრძლივობაზე.



ის, ვინც ერთი თვის განმავლობაში მაინც იღებდა კვირაში ორ ან მეტ ტაბლეტს, რეგულარულ მომხმარებლად ითვლებოდა. აღმოჩნდა, რომ ანთების საწინააღმდეგო არასპეციფიკური საშუალებების (გარდა ასპირინისა) რეგულარული მიღების შემთხვევაში პარკინსონიზმის განვითარების რისკი როგორ მამაკაცებში, ასევე ქალებში 56%-ით მცირდებოდა. დამცავი ეფექტი მკურნალობის დასრულების შემდეგ კიდევ ორი წელი ძლებდა, მერე კი თანდათან სუსტდებოდა. დამცავი ეფექტი ასპირინსაც აღმოაჩნდა, მაგრამ შედარებით სუსტი - ის პარკინსონის დაავადების განვითარების რისკს მხოლოდ 40%-ით ამცირებდა, ისიც მხოლოდ ქალებში. როგორც მკვლევრები ამბობენ, მამაკაცები ასპირინს მხოლოდ გულის დაავადებების დროს იღებენ, ისიც მცირე დოზით, მაშინ როცა ქალები მას ართრიტისა და თავის ტკივილის დროს სვამენ, თანაც გაცილებით დიდი დოზებით და გაცილებით ხშირად. პარკინსონის დაავადება ქრონიკული დეგენერაციული პროცესია, რომელსაც თან სდევს ცენტრალურ ნერვულ სისტემაში დოფამინური ნეირონების პროგრესირებადი რღვევა. დაღუპული უჯრედების მოშორებაში იმუნური სისტემა მონაწილეობს. პროცესს თან სდევს ანთებაც, რომელიც დოფამინის წარმომქმნელ უჯრედებს აზიანებს. როგორც ჩანს, სწორედ ანთების საწინააღმდეგო საშუალებები ამცირებს იმუნური სისტემის პათოლოგიურ აქტიურობას და არღვევს იმ მანკიერ წრეს, რომელსაც პარკინსონის დაავადებამდე მივყავართო, ამბობენ მკვლევრები. მეცნიერებს მიაჩნიათ, რომ აუცილებელია, გამოკვლევები გაგრძელდეს, რათა მედიცინის სამყაროს საშუალება მიეცეს, შეაფასოს რისკის ჯგუფებში ანთების საწინააღმდეგო არასტეროიდული საშუალებების მიზანმიმართული დანიშვნის შედეგები, დაადგინოს ოპტიმალური პრეპარატები და მათი დოზირება.


სიგარეტი, კონტრაცეპტივები და რევმატოიდული ართრიტი
მეიოს კლინიკის მონაცემებით, აშშ-ში ქალთა რევმატოიდული ართრიტით ავადობამ 1995-2007 წლებში შესამჩნევად იმატა. გამოკვლევათა შედეგებმა ცხადყო, რომ ქალებს შორის ამ დაავადების სიხშირე 2,5%-ით გაიზარდა, მაშინ, როდესაც მამაკაცებში ყოველწლიური 0,5%-იანი კლებაც კი შეინიშნება. ექიმებს მიაჩნიათ, რომ ამაში ბრალი მიუძღვის ისეთ ფაქტორებს, როგორიც არის დ ვიტამინის დეფიციტი, თამბაქოს წევა და ორალურ კონტრაცეპტივებში სინთეტიკური ესტროგენების დაბალი შემცველობა, რომელიც ართრიტისგან ორგანიზმის დასაცავად საკმარისი აღარ არის. საინტერესოა, რომ როგორც მამაკაცებში, ასევე ქალებში მოწევა რევმატოიდული ართრიტის რისკფაქტორად მიიჩნევა, მაგრამ, თუმცაღა აშშ-ში მწეველების რიცხვი დღითი დღე იკლებს, თამბაქოზე უმეტესად მაინც მამაკაცები ამბობენ უარს. ცნობისთვის: უკანასკნელი მონაცემებით, 2 მლნ-ამდე ამერიკელი იტანჯება სახსრების ქრონიკული ანთებით, რომელიც ინვალიდობას იწვევს და სიცოცხლის ხანგრძლივობას ამცირებს.


ალკოჰოლი რევმატოიდული ართრიტისგან იცავს
ალკოჰოლის რეგულარული მიღება ხელს უშლის რევმატოიდული ართრიტის განვითარებასო, - ასეთი დასკვნა გამოიტანეს შვედმა მეცნიერებმა, რომლებიც ამ დაავადების განვითარებაზე მემკვიდრეობითი და გარეგანი ფაქტორების გავლენას იკვლევდნენ. რევმატოიდული ართრიტი შემაერთებელი ქსოვილის ქრონიკული სისტემური დაავადებაა, რომლისთვისაც დამახასიათებელია წვრილი სახსრების აუტანელი ტკივილი. მარტო დიდ ბრიტანეთში ეს დაავადება დაახლოებით 400 ათას ადამიანს აქვს. კაროლინის ინსტიტუტის მეცნიერთა მიერ ჩატარებულ გამოკვლევებში მონაწილეობა მიიღო 2 750 ადამიანმა, რომელთა ნაწილი რევმატოიდული ართრიტით იყო დაავადებული, ნაწილი კი ჯანმრთელი გახლდათ. მონაწილეები ალკოჰოლისა და სიგარეტის მოხმარების შესახებ გამოკითხეს. გარდა ამისა, გამოიკვლიეს მათი დნმ იმ გენების მდგომარეობის დასადგენად, რომლებიც რევმატოიდული ართრიტის განვითარებას უწყობს ხელს. გაირკვა, რომ მათ, ვინც კვირაში ხუთ და მეტ დრინქს იღებდა (1 დრინქი 16 გრამ სუფთა ალკოჰოლს უდრის), რევმატოიდული ართრიტი 1,5-ჯერ უფრო იშვიათად უვითარდებოდათ, ვიდრე მათ, ვინც საერთოდ არ ეკარებოდა ალკოჰოლს. ამასთანავე, ამგვარი დამოკიდებულება შეიმჩნეოდა როგორც მამაკაცებში, ისე ქალებშიც. ალკოჰოლის დამცავი ეფექტის მიზეზი უცნობია. ვარაუდობენ, რომ სასმელი თრგუნავს აუტოიმუნურ პროცესებს, რომლებიც ართრიტის განვითარებაში დიდ როლს ასრულებს.


მაღალი ქუსლების ზიანი და სარგებლობა
მაღალქუსლიანი ფეხსაცმელი ქალს აიძულებს, გამართულმა იაროს. გარდა ამისა, მაღალ ქუსლებზე დგომისას იკუმშება დუნდულა, ბარძაყისა და წვივის კუნთები, რაც სხეულს უფრო მოხდენილსა და ტანადს აჩენს. მაგრამ არსებობს კი სილამაზე უმსხვერპლოდ? ექიმებს დიდი ხანია აღელვებთ ქალის ჯანმრთელობაზე მაღალქუსლიანი ფეხსაცმელების გავლენის საკითხი. მათი გამოთვლით, ქალების დაახლოებით მესამედის ჯანმრთელობას წვრილქუსლიანმა ფეხსაცმელმა უკვე დააჩნია კვალი. შედეგები მრავალფეროვანია, დაწყებული ათლეტის ტერფით, დამთავრებული ართროზებითა და სახსრების სხვა უკურნებელი დაავადებებით, რომლებიც ტერფის გადაჭარბებული დატვირთვით არის გამოწვეული. ექიმებმა ისიც გამოთვალეს, რომ ქუსლის ყოველი 2 სმ ფეხის თითებზე ზეწოლას დაახლოებით 25%-ით ზრდის.
ნანახია: 1083 | დაამატა: makho | რეიტინგი: 0.0/0
სულ კომენტარები: 0
სახელი *:
Email *:
კოდი *:
შესვლის ფორმა
ძებნა
კალენდარი
«  სექტემბერი 2010  »
ორსამოთხხუთპარშაბკვ
  12345
6789101112
13141516171819
20212223242526
27282930
სამკ. მცენარეები
სამ. ლექსიკონი
MSteam
მედიკამენტები
საიტები
PSP
AVERSI
GPC
ამინდის პროგნოზი
ვალუტის კურსი
ჩანაწერების არქივი